Am Fritig Obig händ sech de Stuti, de Zügi und ich met em Stuti sim gförlech beladene Schofstransporter, met de Hoffnig uf guets Wätter, uf de Wäg gmacht. Doch chum send mer weder us em Gotthardtunnel use cho häts grägnet und das hät sech s'ganze Wocheend ned wörklech gänderet. Mer drü händ denn s'Glück gha, dass mer nor no händ chönne es Zelt legge wo die andere scho ufgstellt gha händ.

Am Samschtig send mer frühe ufstande. Scho am halbi 10ni. Noch emene guete Zmorge und ewige Diskusione hät endlech öpper ahgfange d'Boot uflade und die motiviert Truppe esch endlech mol echli en Bewegig cho. Ewigkeite spöter händ mer eus uf de Wäg noch Norantola gmacht, wo d'Bootsfahrt ahgfange hät.

S'hät no Rockig ahgfange. Dank mim Dickschiff esch aber de Teil vom Bach keis Problem gsi. Noch eme Zytli esch s'Wasser weder echli ruhiger worde und us em nüt hät sech en risige Stei vo hende uf mech gstörtzt, hätt mech zerscht under sech begrabe und denn no mer mis Paddel entresse. Tja und jetzt beni halt am Brecht schribe.

En Schanze, es Seeli und es paar Weelversüech (ich chans emmer nonig) spöter esch es weder spannender worde. Churz drufabe send mer au scho weder bem Zeltplatz ahcho, wo mer eus met grossem Gebrüll uf d' Zwipfcheste gstörtzt hän, denn de Küsche Stutti und d' Mo send nonig vo de Grottosuechi zrugg gsi.

Noch em Dusche und em fule Umelegge send d'Rahel, de Tobi, de Reto, de Fredy und de Zügi echli go Wasser ahluege. De Amstutz, d'Bea und d'Regula händ beschlosse en Wanderig zmache.

Am Obig send mer enes super Grotto, wo de Stuti und d'Mo uf em letschte Hoger gfonde händ, go esse.

Am Sonntig, noch dem au de Küsche endlech ufgstande esch, händ mer notürlech gmüetlech Zmörgelet. De Reto, de Tobi, d'Rahel, de Vale, de Fredy, de Zügi und ich send witer obe ede Moesa ihgstege, die Andere send denn witer onde de zue cho. De oberi Teil, mues ich säge hät mega grockt. De Reto und ich send uf jede Fall gorderet worde. Zom Glöck händ mer de Fredy als Vorfahrer gha. Es chönt au sie, dass min Creeker ein oder zwoi Liter meh Volume hätti chönne verträge. Mis Boot esch meh unter als öberem Wasser gfahre. Das hät die ganz Sach echli spannender gmacht, so eschs mer au ned langwilig worde.

En Norantola send denn no die Andere zo eus gstosse. Churz druf abe esch denn au scho d' Mo ufere Schwelle verunfallt und sie hät sech entschlosse de Wäg zom Zeltplatzt z'Fuess fortsetzte.

Bem Zeltplatzt ahcho han ich endlech mini Füess chönne strecke und han mech noch es paar Gehversüech entschlosse zerscht mol as Ufer z'hocke und s'Wasser ahzluege. Zom Znacht send mer uf em Zeltplatz go Riesepizza esse.

Am Mäntig send de Stuti und ich met de Vorfreud ufs nöchschte Pfila dor de Schnee hei gfahre.