Teilnehmer:   Fasilitimänätscher
                    Fee

Fritig
Am Fritig Morge hät mech de Reto abgholt und mer send met em Bullaugemobil rechtig Sault-Brénaz abgfahre. Noch Kaffi, Gipfeli und Fahrerwächsel in Bavois händ mer denn d’Schwiz hender eus gloh. Nochere churze Irrfahrt wäge schlächtem Sateliteempfang  und emene Steischlag ede Windschutzschibe send mer en Sault-Brénaz ahcho. Churz drufabe send mer denn au scho uf em Wasser gsi.
Nochere churze Besichtigungsfahrt uf em Kanal esch denn de Spass erst rechtig losgange. Ich han die verschedene Spielwalzene und Wälle usprobiert. De Reto häts lieber echli gmüetlech gno met sim Dickschiff. Noch em Zwipf und witere Rondene uf em Kanal händ mer eusi Chochkönst chönne unter Bewis stelle. Mer händ wohl die beste heavy-duty Hamburger wos get und dezue, gäge s’schlächte Gwösse, Salat gmacht.

Samschtig
Nochere erholsame Nacht  emene usgebige Zmorge esch es weder uf de Kanal gange. De Reto, welch Wunder häts zerscht emol met em four-twenty, ich notürlech met em wohl beste und coolste deför wohl unbequemste Boot probiert. Nochere erste Rondi hät de Reto sis super Spielboot weder gäge sis andere ich säg jetzt mol öberdimensionierte Boot ihtuscht.
Noch velne Rondene ewige Surfereie esch es weder Obig worde. Wo de Reto hät welle d’Heckklappe vode Wilma ufmache, hät die klemmt. Esch halt ned emmer eifach wenn mer Fraue debi hät. Us Mangel a Vertroue e de Automechaniker deför vell Vertroue e Gwalt, hät de Reto gfonde er rissi jetzt mol rasch de Törgreff ab. Die Aktion hät eus aber au ned witer procht und noch echli Geduld und einige güebte Handgreff hät denn s’Problem ohni witere Schade chönne glösst werde und de bunt Obig hät chönne starte.

Technische Daten vom bunte Obig:
1.3 kg Gottlet
1 Glas Senf, Öl, Gewürze (für Marinade)
8 Härdöpfel und Alufolie
Es paar Bier wo so chli gsi send, dass sie eigentlech ned zelled
1 Fläsche Wii
Wie mer us de technische Date chan entneh, häts Gottlet met Härdöpfel geh. De Obig händ mer denn gmüetlech am Lagerfüür met eusne Dütsche Nochbere usklenge lo.

Sonntig
Nochem Zmorge met Drüminuteeier (öpper hät ned eso Appetit gha), ben ich nomol uf de Bach zom no es paar Rondene ztreie vor de Abfahrt. De Reto hät komischerwis ned welle Bootfahre. Er hät deför öber Spontanmigrene klagt. Nochdem au mer d’Elleböge weh to händ, händ mer eus uf de Heiweg gmacht. Nochemene endlose Kampf dor de Stau send mer glücklich und zfrede dehei ah cho.

 

Fazit vo dem Wocheend
Minus ein Windschutzschiibe (Steischlag)
Minus ein Törgriff (mangels Vertraue in Mechaniker)
Plus vell gueti Momänt